നാലുദിശകളിലേക്കും നിലയുറപ്പിച്ച സിംഹങ്ങളും ഇരുപത്തിനാല് ആരക്കാലുകള്‍ ഉള്ള അശോകചക്രവും ഉള്‍പ്പെട്ട ഭാരതീയ സര്‍ക്കാര്‍മുദ്ര സ്വാര്‍ത്ഥലാഭത്തി...
Read more »
Total Pageviews
ടോണിയേട്ടനെ കുറിച്ച്
ഞാന്‍ ഒരാളെ നിങ്ങള്‍ക്ക് പരിചയപ്പെടുത്താം - ടോണിയേട്ടന്‍.
ഒരു ദശാബ്ദത്തിലേറെയായി എന്‍റെ സുഹൃത്താണ് , സഹപ്രവര്‍ത്തകനാണ്.
ജീവിതത്തിന്‍റെ നല്ല ഘട്ടങ്ങള്‍ ഒക്കെ നാട്ടില്‍ അര്‍മാദിച്ചു തീര്‍ത്ത ശേഷം ആണ് ഈ മണലാരണ്യത്തിലേക്ക് ടോണിയേട്ടന്‍ വിമാനം കയറിയത്.
നാട്ടില്‍ ഭാര്യയും രണ്ട് ആണ്‍മക്കളും.
നാട്ടില്‍ പ്രശസ്തമായ ഒരു സ്വകാര്യ കമ്പനിയില്‍ ആണ് ഞങ്ങള്‍ ആദ്യം ഒരുമിച്ചു ജോലി ചെയ്തത്.
അന്ന് മുതലേ ജോലി സംബന്ധമായ യാത്രകളില്‍ ടോണിയേട്ടന്‍ ബൈക്കിന്‍റെ പിന്നിലെ സീറ്റില്‍ ഉണ്ടാകും.
ഒടുവില്‍ ഇലക്ട്രോണിക് യുഗത്തിന്‍റെ ആസന്നമായ മാറ്റങ്ങള്‍ ഇടപാടുകാരുടെ ആവശ്യകതക്കനുസരിച്ചു പ്രാവര്‍ത്തികമാക്കാന്‍ പരാജയപ്പെട്ടപ്പോള്‍ ഞങ്ങള്‍ ജോലി ചെയ്തു കൊണ്ടിരുന്ന കമ്പനി, അത് നീണ്ട മുന്നൂറു വര്‍ഷങ്ങളുടെ പ്രവര്‍ത്തങ്ങള്‍ കൊണ്ട് കൈവരിച്ചിരുന്ന ഉന്നതിയില്‍ നിന്ന് തിരികെയുള്ള പ്രയാണം തുടങ്ങി.
പക്ഷെ ആ പ്രയാണത്തിന് അന്ധാളിപ്പിക്കുന്ന വേഗത ആയിപ്പോയപ്പോള്‍ ഒരു അടച്ചു പൂട്ടലിന്‍റെ വക്കത്തെത്തി ആ മഹാ പ്രസ്ഥാനം.
ഒടുവില്‍ അന്ത്യശ്വാസം വലിക്കുന്നത് കാണാന്‍ ആവാതെ കമ്പനി ഓഫര്‍ ചെയ്ത തുച്ഛമായ വി.ആര്.എസ് സ്വീകരിച്ച് എല്ലാവരും പടിയിറങ്ങി.
പിന്നെ പഠിച്ച തൊഴില്‍ നാട്ടില്‍ പ്രയോഗിച്ച് ജീവിച്ചു പോകാനുള്ള തത്രപ്പാട് ആയിരുന്നു.
ഒരു പരിധി വരെ അതില്‍ വിജയിക്കുകയും ചെയ്തു.
സാവധാനം ആണെങ്കിലും കമ്പനിയില്‍ നിന്നും ലഭിച്ചിരുന്നതിലും നല്ല വരുമാനവുമായി ഞാനും ടോണിയേട്ടനും മുന്നോട്ട് പോകുമ്പോഴാണ് ഗള്‍ഫില്‍ പോകണം എന്ന ആഗ്രഹം എങ്ങനെയോ ടോണിയേട്ടന്‍റെ മനസ്സില്‍ കയറിപ്പറ്റിയത്.
ആര്,എപ്പോള്‍,എവിടെ വച്ച് ഇങ്ങനെയൊരു ചിന്തക്ക് വിത്ത് പാകിയെന്ന് അദ്ദേഹത്തിന് പോലും അറിയില്ല - പക്ഷെ പിന്നീടുള്ള അദ്ദേഹത്തിന്‍റെ ചിന്തകള്‍ മുഴുവന്‍ എങ്ങനെയും ഗള്‍ഫില്‍ എത്തണം എന്നായപ്പോള്‍ പിന്നെ അതായി എന്‍റെയും ലക്ഷ്യം.
അങ്ങനെ കുറെ നാളത്തെ പരിശ്രമങ്ങള്‍ക്കൊടുവില്‍ ആദ്യം ടോണിയേട്ടനും പിന്നാലെ ഞാനും സൗദി അറേബ്യ എന്ന രാജ്യത്ത് എത്തപ്പെട്ടു.
നാട്ടില്‍ വച്ച് യാത്രകള്‍ ഇരുചക്രവാഹനത്തില്‍ ആയിരുന്നെങ്കില്‍ ഇവിടെ സൌദിയില്‍ എത്തിയപ്പോള്‍ അത് കാറില്‍ ആയി എന്ന് മാത്രം.
ഓരോ യാത്രയിലും ഓരോ അനുഭവകഥകള്‍ പറയുവാന്‍ ഉണ്ടാകും ടോണിയെട്ടന്.
പണ്ട് കള്ളും , കഞ്ചാവും അടിച്ചു കിറുങ്ങി നടന്നതും, സ്കൂള്‍ ജീവിതത്തിലെ ഒരിക്കലും മറക്കാന്‍ ആവാത്ത രസകരമായ ഏടുകളും ഒക്കെ.
പ്രത്യക്ഷത്തില്‍ കേള്‍വിക്കാരന്‍റെ മനസ്സില്‍ ചിരിയുടെ പൂത്തിരി കത്തിക്കുന്ന ആ കഥകള്‍ ഓരോന്നും പിന്നീട് ഓര്‍ത്തെടുക്കുമ്പോള്‍ പലപ്പോഴും ഒരു നേരിയ നീറ്റലായി മനസ്സില്‍ പുകഞ്ഞിട്ടുമുണ്ട്.
ശുദ്ധന്‍ ദുഷ്ടന്‍റെ ഫലം ചെയ്യും എന്ന ചൊല്ല് പലപ്പോഴും പല കാര്യത്തിലും പ്രാവര്‍ത്തികമാക്കും ടോണിയേട്ടന്‍.
അദ്ദേഹം തികച്ചും സദുദ്ദേശത്തില്‍ ചെയ്യുന്ന പല പ്രവര്‍ത്തികളും പലപ്പോഴും സഹപ്രവര്‍ത്തകര്‍ക്ക് പാരയായി ഭവിക്കും.
ചെയ്യുന്ന കാര്യത്തിലുള്ള ആത്മാര്‍ഥതയും ,സത്യസന്ധതയും അദ്ദേഹത്തിനു സുഹൃത്തുക്കളെപ്പോലെ തന്നെ ഒരു പാട് ശത്രുക്കളെയും നല്‍കിയിട്ടുണ്ട്.
എന്നാലും വെറുക്കുന്നവരെ പോലും സ്നേഹിക്കുകയും, സഹായിക്കുകയും ചെയ്യും ടോണിയേട്ടന്‍ - അത് കണ്ട് 'ഞാന്‍ ഈ മനുഷ്യനെ വെറുത്തു പോയല്ലോ ദൈവമേ' എന്ന് ആളുകള്‍ പറഞ്ഞു പോകും.
എന്തായാലും ജോലി ചെയ്യുന്ന കമ്പനികള്‍ക്ക് എല്ലാം ടോണിയേട്ടനെ ഇഷ്ടമായിരിക്കും എന്നതില്‍ ആര്‍ക്കും എതിരഭിപ്രായം ഉണ്ടാകില്ല.
ഒരു പാട് രസകരമായ അനുഭവ കഥകള്‍ അദ്ദേഹം എന്നോടു പങ്കു വച്ചിട്ടുണ്ട് - ഞാന്‍ ആ കഥകള്‍ നിങ്ങളോട് പങ്കുവെക്കാം.
പല കഥകളും ഒരേയൊരുതവണ കേട്ടതാണെങ്കില്‍ പോലും മനസ്സില്‍ മായാതെ കിടക്കുന്നത് ചിലപ്പോള്‍ ഒരു പക്ഷെ എന്‍റെ മനസ്സില്‍ ആ മനുഷ്യനോടുള്ള സ്നേഹക്കൂടുതല്‍ കൊണ്ടാകാം.
ടോണിയേട്ടന്‍ വിമാനം കയറിയത്.
